Matthew 10
Iesu Sila Lat Meatin Teindan Elu (12) Onen a
1Iesu vise meatin teindan elu (12) onen keke umai vesesal veni. Kei san keihoen min keil avahile lat ninin tisa keil ka avasak revi meatin vasi keil koa akur mesaien savsav keil.2Ka koanik isen eiloheh teindan elu (12) enek onen Iesu:
Koa mulamu, Saemon (koa isen tamun Pita)
ka Andiru (tunali Pita).
Tiemes (natin Sepeti)
ka Sion (tunali Tiemes).
3Pilip,
Batalemiu,
Tomas,
Matiu (koa lah takis),
Tiemes (natin Alveas),
ka Tatios.
4Saemon (koa mul en vangi meatin keil koa evati mok keke Siu keil avamaluv ran hen kavmen ten out Rom)
ka Sudas Eskariot (koa hesa lat Iesu heha en hen meatin tatisa keil).
5Meatin teindan elu (12) enek onen, Iesu sila lat keil uva ral min selusien keil ekek: “Minahatei ven koakeil arvitei Siu vuo en taon keil onen me-Samaria keil. 6Ka miheha enges ven meatin keil ten out Isrel koa asuval sipsip keil koa avupuol. 7Ka navong mimul mivaha, mihehitehiten more longlongien enek min keil mihehit, '!Hiasuvien onen Ahi mul mai vesesal!' 8Mihesak revi meatin keil amesai, mihetali lat koakeil umat ran matien, mihesakin koakeil akur mesaien leporsi ave ito ris, ka mihehile lat ninin tisa keil ran meatin keil. Navong mihekataun meatin keil, mihesa maeni, veni tounah vasi koa kami mikuri, Ahi sa maeni min kami. 9En ualien onami, minahuli kattei mane 10vuo ateli. Minakurtei eisin tamun, sandal tamun, vuo eisal tamun. Naviteni mukok veni mal keke meatin toumien keil ikur anien en hen koakeil amum min keil.
11“Navong mihemai en taon vuo meteimal tai, mihehotin meatin tai koa hesi kei keke vakur revi kami. Miheto en teim sen hetokol avong mihelokovein out enek. 12Ka navong miva keke mivato en teim tai, helamu mihehiteni mihehit, 'Tomat onen Ahi hel ven kami.' 13Munak meatin keil en eim enek ikur revi kami, tomat onami hel en keil; ka munak keil isesein kami, mihekulat ris tomat onami ran keil ka miheha. 14Ka munak meatin tei keil irkur revitei kami vuo erovattei avalong selusien onami, mihemea ran keil. Ka navong mihemea ran teim se vuo taon one mihesahulin vulimeas ran alomi en mete. Koanek hesakin keil ilea suk keke amumoni romaltei en meten Ahi. 15Anatin eli naviteni min kami, en Avong koa ilei revi usite vasi onen meatin keil, mahien koa Ahi hesani min meatin keil koa aro en taon enek hekeih heli asa koa hesani min meatin keil koa aro en taon ten out Sodom ka Komorah mulamu.”
Iesu Sel Kat Meatin Keil Onen Vit Sakvisien Keil ka Avong Takeih Hemai b
16Iesu sel kat meatin keil onen vit, “!Mihetaengonau! Inau namul nasila lat kami miva suval sipsip keil koa uva amul luhu en vangi huli rendan keil. Sakini, kami mihelele revi ka sakien onami hetolas. 17Anatin, mihelei kat revi kami, veni hetetamen keil onen Siu keil ihuli kat kami ka iling kami mihelomal en kot keil one. Keil itah kami en viau takan tai en eim tahihiseien keil one. 18Ka veni mimusil kat nau, umon kami mihelomal en meten hetetamen keil ten kavmen ka asuv houlu keil emun. Ka hesakini miheilea mihehit lein more longlongien min hetetamen keil enek ka min koakeil arvitei Siu. 19Ka navong ihuli kat kami, minandemkotei ven asa mivahiteni vuo hemukave mivahiteni. Veni en avong enek, Ninin Votut hesan asa koa kami mihehiteni. 20Anatin, hervitei kami koa miheselus, ka Ninin onen Tata onami heselus heka en kami.21“Meatin keil imae lat tue kati keil keke uas keil imat, ka tata keil umoni hemuknetinek min titae keil. Ka titiali keil emun ihiles min tata ka mama one keil ka imae lat keil keke meatin keil u vini keil. 22Meatin vasi keil tine heat kami veni mimusil katnau. Ka kami koa mihelomal hekeih hetokol keite ten sakvisien keil enek, Ahi houtut moulien onami. 23Navong keil asan mahien min kami en meteimal tai, mihelohosai miheha en meteimal sav. Anatin eli naviteni min kami keke miherva vasitei mau en taon keil ten out Isrel, ka Natin Meatin hemai ris.
24“Meatin koa kur hihiseien en tiser tai nandemtei nahit kei vi hetetamen imok lohlin tiser onen. Ka en vati sakien koanek, slev nandemtei nahit kei vi hetetamen imok lohlin masta onen. 25Sakini, kami koa mikur hihiseien keil onak, tahos mihesi kami keke mihemai mihesuval inau, tiser onami. Anatin, kami koa misuval slev keil onak, mihesi kami keke mihemai mihesuval asuv onami. Ka munak avise karen inau, avat onami, en 'Belsepul', ▼ miheilea keke ihise karen kami mun mivi onak keil en tounah koa hetisa mok.
26“Sakini, minametauntei keil. Tounah koa meatin sak visi vav koe, Ahi helah lati hemai en mesai. Anatin tounah koa aling suaini, Ahi hesakini hemai en mesaiuai keke meatin keil ilei kilea eni. 27Tounah koa naviteni min kami enges en vongien, kami mihehit leini min meatin keil en meneai. Ka asa koa navit lelau eni min kami, mihehitehiteni en meten meatin keil.
28“Minametauntei koakeil akilea avou vini avemi ka asakras avou vini ninin onami. Tahos mihemetaun Ahi enges, koa kilea vapurun avemi ka ninin onami emun en Ahang koa sakras vavus. 29En selen tas, mikilea mivahul titi aman valu. Ka munak Ahi Tata onami hermaentei, tai en keil sakras vamot vamat. 30Ka kami emun, Ahi vuli vasin hilumi koa amul en vatumi. 31Sakini minametautei veni, en meten Ahi, kami mivi hetetamen emok mulin titi aman keil houlu.
32“Meatin koa vit leini keke kei vi meatin onak en meten meatin sav keil, inau mun, nihit leini keke kei vi meatin onak en meten Tata onak en out nesa. 33Ka koakeil aviteni en meten meatin keil keke aseseinau, inau mun nihiteni en meten Tata onak en out nesa keke nasesein keil.
34“Minandemtei minahit inau numai keke maling tomat en out netan. !Vuo! Narmaitei keke maling tomat, numai masakin meatin keil ivae kat keil. 35Suval Tus Votut viteni, numai keke masakin ...
'meahos keil ihiles ivae hetal min tata one keil,
atouli keil ihiles ivae hetal min mama one keil,
ka ahineli keil ihiles ivae hetal min avu ahin one keil.
36Anatin, meatin hehi vativieh
hetal min koakeil amul en teim kati osen.'(Maek 7:6)
37“Koakeil envatien one mul en tata vuo mama one mulin inau, keil arvinvintei avahi meatin onak. Ka koakeil envatien one mul en ehon vuo atouli keil one mulin inau, keil arvinvintei avahi meatin onak. 38Koakeil arvustei aiveave ten mahien one keke avousil kat inau, keil arvinvintei avahi meatin onak keil. 39Koakeil asak visi keke avahuli kat moulien one en out netan, moulien ten lisenges hevuol ran keil. Ka koakeil amaen moulien one vavuol en out netan veni amusil kat inau, keil ikur moulien ten lisenges en out nesa.
40“En ualien onami, meatin koa hekur revi kami, hesuval koa mul kur revi nau. Ka koakeil akur revi inau, hesuval koa amul akur revi Tata onak koa sila nau numai. 41Anatin, meatin koa kur revi provet tai onen Ahi veni kei vi provet onen, Ahi hesan uite teni mini hesuval kei mun vi provet tai onen. Ka meatin koa kur revi meatin koa moulien onen mal veni kei mal, Ahi hesan uite teni mini hesuval kei mun vi meatin koa mal. 42Ka meatin koa san tounah tai vakataun meatin tai onak koa vi havivi mok en meten meatin sav keil veni akilea kei musil kat nau, avaseini vi oai tamandil enges, anatin eli naviteni min kami, kei hekur vasin uite teni.”
Copyright information for
PMA